jezičnica kajkaviana


REZULTATI 6. NATJEČAJA ZA KAJKAVSKE KNJIŽEVNE
RADOVE UČENIKA SREDNJIH ŠKOLA
REPUBLIKE HRVATSKE*

       Silvio Košćak, 4. d
       Medicinska škola Varaždin
       Mentorica: Nataša Sajko, prof.
       (Govor: Završje, Radovan)

Koli Bele


Kmica.
Gosta temna kmica.
V šašju krej Beje čvrčki čvrčiju
Na nebu žoute zvezdice
koli srebrnog meseca...


* 6. NATJEČAJ ZA KAJKAVSKE KNJIŽEVNE RADOVE UČENIKA SREDNJIH ŠKOLA i
ove je godine naišao na uzoran odaziv. U njemu je sa 100-ak kajkavskih poetskih i proznih radova
– pisanih na 25 raznolikih zavičajnih idioma /lokalnih kajkavskih govora - sudjelovalo 35 učenika
i 23 njihovih mentora iz 20 srednjih škola RH. Za objavu u ovom dvobroju Kaja ocjenjivački
je sud (prof. dr. Joža Skok, dr. Ivo Kalinski i mr. Božica Pažur) izabrao 15 radova 15-ero autora iz
11 srednjih škola. Najzastupljenije u ovom izboru jesu Prva gimnazija Varaždin, Srednja škola
Oroslavje i Medicinska škola Varažadin. Valja posebno istaknuti zrelost i akribiju kajkavskih
proznih tekstova. Podsjetimo, Natječaj – jedini takve vrste u nas zbog kreativne upućenosti na
srednjoškolsku mladež cjelokupnoga kajkavskoga govornoga područja, i šire – tradicionalno raspisuju
časopis Kaj i njegov nakladnik Kajkavsko spravišče unutar programa “Jezičnica kajkaviana”.
Zahvaljujemo na suradnji svim učenicima i njihovim profesorima (mentorima, voditeljima),
te raspisujemo 7. natječaj za kajkavske književne radove učenika srednjih škola RH

 

Rezultati 6. natječaja za kajkavske književne radove učenika srednjih … - KAJ, XLI, Zagreb 3 (2008)


Z daljine me dva dverca glediju.
Idem
prek bednjanskega mosta.
Morti je baš tu stari Ožegović
Z ženum stal!
Kuliko se pout mlinski ketač obrnul,
kuliko je vode spod mosta preteklo!
Neje več ni barunov ni grofov,
a zutra morti ni nas ne!
A mutna bedjajska voda teče i teče
i kak da nam sem Bog bukvicu čte!


      Emina Žnidarić, I. A
      Medicinska škola Varaždin
      Ravnateljica: mr. sc. Mirjana Kos-Grabar

Zakaj?


Zakaj se istina v srcu skrivle
Zakaj jo saki človek prekrivle?
Kaj je tak hudo i kaj tak boli
Če se istina z lažmi vrti?
Či je istina takša kakša mora biti,
Nesmimo jo prekrivati!
Pitam se či i lepo more postati
I v srcu pomalem zaspati.
Či more, zakaj mi nišče povedo neje
Istinu kera ga v sercu greje.


 

Rezultati 6. natječaja za kajkavske književne radove učenika srednjih … - KAJ, XLI, Zagreb 3 (2008)


      Mateja Ferjanić, IV.c
      Srednja škola Pregrada
      Mentorica: Valerija Hržica, prof.
     (Lokalni govor Krapine)
 

Po delu se človek pozna

Još je kmeno i sunca ni, a moram iti na praksu – h bolnicu. Mislim si kak bu to gda se bu moralo vsako jutro tak zdiči i na posel iti. Bormeč lefko ni. Kmično je, vse je tiho i tak mi se još spi... hčera smo dugo čuli.

Samoj sebi zgledim kak mala mravljica i pitam se kaj bum ja to mogla pomoči človeku, a tak i cielom svietu. Tuliko je ljudi betežnih, se tužiju da ih snaga napušča, da ih tielo boli, a boli ih i kaj nemreju več delati. A vsaki bi moral misliti kaj bu delal na tiem svietu. Moral bi, al to lefko ne ide.. H glavi se tak berzo vse nekak z meglu ovije i postane zmiešano i Internet, msn, poruke na mob-u i puno, puno toga... Ruke treba vuriti z delom, govori furt moj dedek.

 Misel mi se omekne k vremenu gda sam pri šparhetu na šamrleku sedela i rukice griela (su ruke zanohtale na sanjkanju). Baka mi ih je h svoje lasi porinula kaj me bu prie prestalo cukati h njima, kaj mi bu toplejše... Onda me je dragala po licu, po rukah, po lasekima...Nisu njejne ruke bile liepe ni mlade, nek naborane, z šinjaki i terde. Ali nekak toplo terde – od posla, od toga kaj se furt nekaj hasni. Pitala sam se kak te ruke moreju i znaju napraviti tak fine buhtline, štrukle i gibanice. Kak te trde ruke imaju takve rahle gredice h vertu. Kak tak trde ruke moreju zaštrikati tak mehke štumfeke...

Dedek mi je jabuke zelenike donesel i grojzdek dišeče izabele kaj je čuval hpalnice. Još mi je dal da morem dragati njihovoga bieloga mačka. Mu je, to tak za šalu, pokazal da bu ga z hlačnjakom ak ne bu dober. Maček mu se samo naškiljil, kak da mu je namignul, leno glavu obrnul naj ga moje ruke malo dragaju po vratu. Onda smo se tak vsi smejali i greli i te ruke su mi zgledele tak bogate i močne, kad tuliko toga napraviti znaju i moreju..

Vreme ide, kak potok protiče, od toga je prešlo več kak deset let. Se mienja vrieme i nosi svoje breme. Meni je praksa tuo breme, kak da bi z huste pušelj derv nosila, da te na pleča pritišče. Zranja se zdiči, na autobus stiči i delati. Kuliko moreš, delaj – bi rekel dedek, ali furt hasni, naj hmajnjguvati. I naj pozabiti kaj si i čija si, naj ti delo h ruka diši. Se po delu človek pozna...
Sunce več Krapinske Toplice kuplje i kostanji su kak gizdavi gosponi, a h granju im mali ftiči spiju...MP 3 i glazba h vuhu...rieči engleske... se razmem, a ja sam z Hrvatske? Z pekare zadišiju buhtlini, misel podraga baku i dedeka, ja sam zrasla. S tiemi misli sam na odjel došla. –Ak si h bielo oblečena, budi kak anđelek, dobra ljudima navek – pošilja mi poruku mama. Si bumo stari i pomoči potrebni, naj se zmeknuti gda moreš pomoči. Človeka gledi v dušu, v oči...


Još malo i imela bum h ruka svoj kruh, kak se veli gda zbaviš školu. A ruke nas, fiozioterapeuta, moraju biti i jake i mehkle, uporne, moraju vračati snagu i volju. Največa sreča i radost največa bu gda z bolnice ozdravljeni ljudi k domu
išli buju, a serce se bu širilo kak godovi h drievu gda raste...H granju se buju gniezdili mladi tiči, a korenje h domačoj grudi kak da mi šepče –Ti si tuj doma i nikam ti ni treba oditi... (a ja bi štela nekam hvujti...)

Kak h mravljinjaku vsaka mravljica zna svoj posel morti bum i ja h tom ljudskom nravljinjaku znala kaj mi je delati...

 

      Morena Šuk, 4. a
      Srednja škola Oroslavje
      Mentorica: Barica Gradiški, prof. savjetnica

Kaj je meni dost


Nekomu je trofej glava afričkoga lava,
Njegva griva i kouža debele šare kače.
Življenska mu je rama sive bogatstve i evropska slava,
V geldtašlinu eurof kak šalate i amerikanske žvakače.
Nekuga vabiju evropske zviezde i vatrometi,
Zasmucani zrak i škrljak od suhoga zlata,
Šnjofi švedskih stolof, a bez tradicije šekreti,
Pelc-mantil, gliboki žep i črni „hamer“ od avta.
Meni je dost orlof prelet znad kajkafskoga krova,
Zagorska legenda i fpučena rieč zgrieta domača.
Za dušu su mi hrana bregi zeleni i nebeska štrafta plava,
Starinska škrinja puna povede i požutela prediedina rubača.
Srčeko mi grie pucin smieh čez pitome brege,
Em dečecova f šahovnicu ofarbana huncut-glava.
Z “kaj” popiefku ja vračim horvacke žuhke betege,
Tu kipci su mojih korenof i moja prihajajuča Buožja slava.

      Viktorija Šakoronja, 4. a
      Srednja škola Oroslavje
      Mentorica: Barica Gradiški, prof. savjetnica

Dišal je


V rane jutre babica
Se zdigla
Tihe da ju ni bile za čujti.
Melja, kvas, voda, soul...
S trudnimi rukami miesila je
Douge, douge...
Več je sunčeko bile vun.
Gotove.
Tak je dišal.
Dišala je vuolja.
Dišala je muka.
Dišalo je seme.
Dišal je kruh.
Kruh moje babice.
Zlatan kak jesen
Tera se vidla čez
Oblok.

 


      Vlatko Hrček, I. EA
      Srednja škola Zabok
      Mentorica. Marija Pavlović, prof.
     (Đurmanečki govor)


Megla


Hjutre rane
uz Kupu
si je legla
trudna
raskuštrana
megla.


       Mateja Ratković, 4.b
       Prva gimnazija Varaždin
       Mentorica: Vesna Janić, prof.
       (Govor Ljubeščice)


Dirigenti i mužikaši


Lepi je pregorski kraj z svojimi šumami, bregima poljima... Dok ga sunce zbudi, pak zablešči, trava zadiši, a listje zašumi, v srcu ti nekaj zadršče, v prsima nekaj zatišči od sreče, od te lepote. Glediš okole, okreneš se, vdehneš friški zrak, postaneš lefki kak tič koji širokim nebom leti... Kalnik stoji tam dalje, visoki, črni, tihi i mirni, pak si misliš: gleč, kak se skup z nami veseli bolšem životu, sega je već on videl, preživel dobre i zle. A hiže male, stišnjene, rekle bi se premale za tuliku družinu, ali ljudi su srečni i zadovolni, a najvažneše od svega, vrijedni i skrbni – polja su njihov život i kruh. Dok se naraštaji podigneju, pune se motiki razdere, pune krvavih žulof puči i pune noći prečujeju...

Dojdu pak onda i oni dani koje je dragi Bogek odredil za počinek. Sa se družina razveseli, si se radi imaju i saki za sakoga živi. A gosti po Pregorju pamtiju i ljubeški dečki... Pune put su se oni tam najeli, napili i pogostili, a neki i od tam oženili. Hodile se tam na tanc i veselicu, a neki su hodili služit, te su vam bili ljubeški mužikaši. Za Pregorje je vredile: veselica dan i noć. Dok se jemput štrument v ruke prijel, više ga nisi smel z ruk pustiti jer narod se veseli, peneze su im lepili na bajs, na harmoniku i za njedra, same da mužika ne stane, kak da su bili strahu tišine koja ih je podsiećala na teške dane, posel i brige.

Si su popevali z mužikašima, prašina se zdigala od tanca, gutali su ju skup z mesom i kolačima, pili skup z vinom, nikomu ništ ni smetale, jedine su se miši i sakajačka domaća živina razbejžali po kutima i vuglima radi drndanja i kriča,
a bubnjar ni jemput i dvaput digel noge v zrak, dok mu se miš v bubenj zaletel. I te ni nikoga smetale... Popevka iz srca čez Kalnik zvoni, a siromašni čovek se veseli...


Jemput se je neke spremenile. Došle je tak nagle, čist z pameti ziti, kak da su se čega splašili, a trebali bi se zaprav veseliti. Došla je struja, a skup z nju promene v mužike.

Se se je skup naelektrizierale, tambure i ostale, odjemput je tu bile klafter kablof i kutiji, nekakvih razglasov i sakajačkih noriji kaj običnom čoveku ni bile potrebne, sega je bile preveč. A hiže su ostale male, stišnjene, družina vesela. Neki su struju dobili, neki nisu. Vlekli su se kabli čez slivlje i grunte, gnoje i koce, zapletale su se noge, razbijali nosi, mužika igra i nikoga ne smeta...Nekoji od mužikašov je mikrofon sprobaval, od žveka i cvilenja lasi su mu v zrak stali. Si glediju kaj bu i zakaj već jemput ne igraju, a unda su se mužikaši zmislili kak bi se cvilenja rešili, pak su hižu spraznili. Kredenc i postela za čas su bili vune, čak i vruća peć, nikomu ni smetale kaj više ni gorela. Ve bu kaj bu – misliju mužikaši, zaigraju, zapopevaju, za prav, hteli su zapopevati, ali dok je jen od njih čube blizu mikrofona prislonil struja ga je tak stepla kaj su mu čube mam kak traktorske gume postale. Vudri se ljudi smejati i kable pukati, bubnjar se je nabil v kut i da je štel, nije mogel otiti. Zeni su prešli mužikašom čez prste i ruke, odjemput im je bile vruće makar šparet više ni gorel. Od brige mužikaše znoj oblieva. Vun nemreju, ljudi su pred njima, iza njih, se okole veseljaki koji vezda i nisu bili tak veseli. Bubnjar gledi kaj se bu zgodile, a onda se je nešče zmislil kak za vugličem bajs stoji i već je tu, mužikašima na ponude. Pa kaj će im struja, pak oni i bez nje živiju i ljudi već letima bez struje igraju i popevaju?! Štrumenti su spremni, žice napete brenčiju... Cielu noć je bile liepe, vesele, pijane...Odavna su pevci svoje odkukurikali i dan dozvali, nišče ih nie čul. A zakaj i bi, nikomu se nikam ne žuri. Same je mužikašom nekak teške bile dime iti, puti su bili nekak prevuski, trčki v trave skriti, a golendar na mostu previsoke zabiti, pak se nisi mogel za njega dobre vloviti. I bajs je mislil da je bole v potoku, nek na plećima, pak se v golendar zadel i skup z bajzarom v potek zletel. Nikoga ni smetale. Bajs se je bil tak i tak rasušil, a bajzar se nije od prekščera hmil, ve se je mam i strijeznil.

Posle se je bajs zapuhnul i rasušil i zapuhnul i pune je još spopevanciji bez struje bile.

A denes već pomale saki od toga bejži. Družina se drugač poveseli, hiže su zrasle triput vekše nek kaj su prije bile, same je družine nekak menje i se se menje z srca popeva.

     

      Valentina Lacković, 3. i
      Prva gimnazija Varaždin
      Mentorica: Slavica Kadija - Popović, prof.


Vzgublena


Zaprta vu se,
sramežljiva i zaklenjena
v krletki življenja.


Ničija nesem,
pak ni svoja više ne...
vzgublena v labirintu življenja.


       Veronika Đuran, 3. i
       Prva gimnazija Varaždin
       Mentorica: Slavica Kadija-Popović, prof.


Pretrgjeno srce


Zdrapano platno
more se zašiti,
deska pretrgjena
z čavlom zabiti.
Rastrgani zid
mort fletno pokrije,
z farbom pobeliš
pak je se kak prije!
Pretrgjeno srce
nigdar više ne zaceli,
za navek ostane
vu dva dela...

 

       Ana Mužević, 3. a gimnazije
       Srednja škola „Vladimir Nazor“ Čabar
       Mentorica: Danijela Peršić, prof.
       (Čabranska kajkavština)


Hiša v sjele


Ana hiša v majhnemo sjele staji.
Bejua i lepa.
Uotprta uokna na sunce se bleščijo.
Pred hišo pesek uaja
i kravica se sliše zes štale.
Pred hišo muž pa žjena sedijo.
Več so sztari, al se še tak radi imajo.
Radi hišo imajo,
radi štauo pouk hiše,
radi živet imajo.
Lejta prehajajo, dan za dniven,
a uoni se še bel skep držijo.
Aden druzga pamaga,
aden drugmo vse je na svejte.
Al denest muža nej.
Žjena v črnine sedi,
glida nejkan djeleč koda kaga čaka.
Tak se pačute sama,
i za smrt se svajo mule.
V rakah zmečkano slikco drži.
Vse suzi je več zjukaua
i samu čaka, čaka, čaka.
Vej da hitru bodo uoči se zaprle
i raki se opestile.
A hiša i drel staji na istemo mejste.
Še je bejua i še je lepa.
Al uokna so zaprta,
peska nej več
ni kravce nej zes štale slišat.

Te i tan kaka tička z navike pride.
Papejva vesiu, al kamu?
Čaka da nedu z hiše pride, da jo sliše,
da je kamadiček kruha vrže.
Al dougu nebenga nej,
nebenga kedu be jo slišou.
Zajdno pejsmo otpapejva
pa se i ouona žauasna obrne
i otide.

 

     Tea Kordiš, 1. a
     Opća gimnazija Delnice
     Mentorica: Jasminka lisac, prof.
     (Ravnogorski idiom)


Prošlost va sadašnjosti


Život kakovim vsi dans živima sigurnu ni takou ku nekej kej bi povezal iz prašlim cajtam. Brzu delat, dabr se slušt iz tehnika kere je čuda, devjat, devjat... Usi čeja nekej nouga zak to je bel i moraš bit „inn“. Novi mobilni telefoni, Plej
Stejšni 3, MP 4, laptopi pa i maderne hrvatske reči ku reč dvokrišak kera mejna reč sendvič, il smečnjak za kontejner... Ali usi mi ne mislimo da usak dan imama veza iz unim kej je blu preja.


Vesela sen kej morem živet z staramama kera je do amal prejk delala pasle kak ih je delala prek pedeset let. Ad ne paslušam lepih prič, punih lepote, smeha i dabriga. Vidla sen da se neke stvari iz unga cajta delaju istu ku dans, ku naprimer ljubav kera je bla ista dans i prejk, sam je drugačn pot na ker je prikazana. Prejk je fant sviran pad aknam, dans to dela SMS poruka „Hoćemo brijat?“

Ili neka starinska ela kera su prejk kuhal dabra su i dans, ku naprimer kalačk kerga je staramama navadila delat va vreme ka je služla v Zagrebe. Prošlost kera je apstala i dans sa običaji krščanskih blagdanov. Seglih se je dast tega premejnalu i današni Dida Mraz je patisnu mičkeniga Isusa. Neki od običajou sa astal. Moj brat i dans gre staramamam zjutra u hiša „čuvat lance“. Usi veja da ta dan u hiša prvi pride moški da prnese blagoslov i sreča v hiša. Mesto krmenčkov i voča dans davaja dnarje.

Ak pagledama bel akol sebe vidl bama da je anu kej je blu prejk tak to akolnas i u nam. Ka imam cajta gledam akol sebe, vidim stare, lepe hiše, naša cerkva... Slike zrušenih hiš nam ne da da pazobima strahote ratnih let.


Prošlost nam zacrtava pot. Use lepo kej nam se prepetilu i kej pamtima i čuvama ku blagu. Use grdu kej čema pozabst... iz kerga sma zvlekl svet kerma živima ješče od nas da bel mislima i živima madernu i brš. Ali prošlost je diu pota kerim grema. Makar je uni ker je prašlu, prašlu.


Ku usak dan bez kerga budučnost ne bi bla takova kakova bo bla zak usak naš pasu pusti trog na emu kej bo blu. Prošlost nas vadi kadu sma i kej bi trebal bit. Čuda lepih stvari iz prošlosti trebal bi sprajt, ad reči, govora i običaja do sagdašnjih mičkenih stvari. To moremo sam ak uz maderno i prošlost žvema dans.

 

      Ana Tuković, 1. a
      III. gimnazija, Zagreb
      Mentorica: Branka Milković, prof.
      (Zelinski govor)

Stani! Kam furt letiš!


Denešnji čovek
se furt nekam žuri.


Pa same poglečte okoli sebe,
če je čovek star,
žuri se stade
svoje verne podojiti,
naraniti i napojiti.


Če je male mlajši, po cele dane dela,
ni kruha ne poije kak treba,
same govori: „Da bi kruha imel, delati treba!“


Deca male stareše žuriju se misliti,
školu do kraja zbaviti, da bi
kesneše od toga dobre koristi imeli.


I najmlajši čovek na ovomu svetu
vremena nema, zadaču brže napisati mora,
da bi pokle bila igra i sloboda.

I ti koj sad ove čitaš i tebe se,
sigurne, nekam žuri, ali stani, da ti
ja neke velim.


Prvi pot gda buš videl
nekoga kak se žuri, reči mu: „Stani“,
i pogleč okoli sebe skup ž njim,
kak je lepi svet,
kušni najdrajšoga, reči koj očeš i misliš,
a naj se same žuriti.
 


      Marta Pleško, 2. i
      Srednja škola Koprivnica
      Mentorica: Zdenka Brnica, prof.
      (Govor Ferdinandovca)

Moj dedo


Sakaj mi dedo lepoga zna reči,
povedati se kaj čuje od reči do reči.
Na njegove glave večno škrilak stoji,
negda si na pol dvora stane i novce broji.


Prav je muder moj dedo, kak filozof pravi,
navek je važen dok dobroga posla obavi.
Ponosen je na svoje dve vnuke,
se njen bo dal bez imalo muke.


Moj dedo ima rada svoje mekote,
saj je važen dok traktora vozi i onda
glavo visoko drži.


Svojega dedu ne bi nikomu dala,
dober je i pošten čovek
i takvoga ga imam jako rada.

 

      Dolores Andročec, 2. EK
      Srednja škola Prelog
      Voditelj: Milorad Sarap, prof.
      (Međimursko-goričanski govor)

Jal ili nekaj drugo?


Si ste već sigurno čuli za međimurski jal. Ne znam da li je jakši nek drugdi, ali je sitak najpoznateši. Moja prabaka i njezina kuma Treza su si navek bile zdobra. Lepo su jedna drugu navek pozdrajle, jedna drugu ponudile s kavom i lepo se odprajle. Ali saki put dok je kuma dišla dimo počela je prectava. Gledim jo baku kak stišče zobe i saki čas nekaj mrmlja. Pak to se baka sama z sobom svadi, z rokami klamateri, kak da nekoga goti.Zdele tak nahitavle kaj sam si vuha morala zateknuti i saki čas ji jerobec, koji ji inače navek stoji kak zlejoni, bežav naoči a losi stršali na se strone. Mom je bilo jasno da baku nekaj fejst duši. Jen čas sam si premišljovala, ali bi bilo bolje močati, ali kaj pitati. Unda je bez pitanja potekla reka reči: “Ona, ona bu me vučila kak živeti, ko je navek se v življenju mela, ko ničesa ni bila željna, ko je ni trebala z ničesa nakaj naprajti. Ron ona nema kaj govoriti. Hižo su ji naprajli, dvora zasfalterali i ve je još i novoga baršunastoga dudeka sam tak dobila. Je, to ne nikakva emitacija. Vidla sam jo, to je provi baršun.
Tak je mefki kakti sam oblaki mefki morejo biti. "

Pa kaj se ve tak srdiš? Em su navek bili bogoti – prekinem ju jo. “Tebe sam, ni nikaj pitala, ti moči i pi čaja dok ti je topel. Pak si jo vidla, kak daj biv sever snegom puhav se blekla, ali morala je dudeka pokozati, a praf je denes toplo kak protuletje. Tak topel den je ovu zimu još ne biv.” Baka, baka, kak ste vi jolne jedna drugi! Ona pak si nemre nojti mesta kaj ti imaš se navek tak čisto i čipkane stolnjake delaš kakve nišči ne zna naprajti. Ti pak si kak gospa makar nemaš tulko penez; smirim jo baku. “Ih, takvoga lepoga dudeka več dovgo nisam vidla. Ali ve dok ga ona ima, bormeš, neti si ga ne želim.” Malo po malo je srdito lice ko je naveščuvalo rata postajalo milo kak navek. Jo sam mami sprepovedala situacijo, i mama ji je za rođendan kupila baršuna, još lepšega kak ima kuma, i zašila našlinganoga dudeka kakvoga si je kaktili ne želela. Mom je posjetila kumu v dudeku makar je več protuletje trajalo i sigurno ji je bilo joko, joko vroče. Da pak ste unda vidli facu kume Treze, kak bi se smejoli... Kak si skup ne znamo kaj nas v življenju čaka, kakve zamke, štere nam zarobe dušu i srce, pak nam zbudijo toga jala, nesmemo oštro suditi druge koji ga več imaju. Je opče to je jal ili pak nekaj drugo?

 

 

      Marija Čulinović, 1.a
      Ekonomska škola Sisak
      Mentorica: Jadranka Zelić, prof.
     (Turopoljsko-posavski govor)
 

Hrvacka nošna


Hrvacka nošna je najvredneša i najlepša obleča hrvacke Posavine.
Negda je seljak nosil nošnu i svetke i radne dane. Zate su nošne podelene u više nošni. To su radne i svečane nošne. Radne su obične bele, a svečane su prebirane. V svečane nošne spadaju hrvatica, modernina i našvenina. Hrvatica
je prebirana nošna muštrom kocki z crvenim pismem. Modernina je prebirana muštrom roži z crvenim i crnim pismem. Našvenina je nošna našvavana na domačem platne, muštra su rože i i našvavana je z raznobojnu svilu. Nošne su
seljanke same delale na razboju. Bele radne nošne su se same tkale, a svečane su se prebirale. Tkala su se i platna za muške rojte i rubače. Ženska nošna ima podoblaček, rubaču, zaslen, švabicu ili jopeleče, zavisi kak je koja naređena Sneje su još na glave nosile poculicu ili halbicu, a dekle su imale kite i mašline. Oko vrata su nosile crlene i bele struke. Obute su imeli jopajnke. Nošna je bogatstvo naše baki koje su ih delale. Pune dece i ljudi ne znaju ceniti nošne, ali to ne ni čudne kad ih to ne nikad zanimale. Mene je nošna prelepa i imam svoju nošnu. Znam ceniti nejnu vrednost jer znam kulike je truda uložene, jer ih delaju moja baka i mama. Nošne su se delale po zime kad ne bile posla napole. Pune je neprespete noči da bi se one naredile.
Same jene znajte – nošna je cele bogactve koje se nemre iskazati v penezi. Nošna je neke najvredneše i najlepše na svetu.

 

 

 

Copyright © 2008 KAJKAVSKO SPRAVIŠČE

design by LETIBO